ՖԵԼԻՔՍ ՄԵԼՈՅԱՆԻ ԾՆՆԴՅԱՆ 85-ԱՄՅԱԿԻՆ ՆՎԻՐՎԱԾ ՀԻՇԱՏԱԿԻ ՑԵՐԵԿՈՒՅԹ
ՖԵԼԻՔՍ ՄԵԼՈՅԱՆԻ ԾՆՆԴՅԱՆ 85-ԱՄՅԱԿԻՆ ՆՎԻՐՎԱԾ ՀԻՇԱՏԱԿԻ ՑԵՐԵԿՈՒՅԹ
Մայիսի 7-ին ՀԳՄ կլոր սրահում տեղի ունեցավ գրականագետ Ֆելիքս Մելոյանի ծննդյան 85-ամյակին նվիրված հիշատակի ցերեկույթ: Բացման խոսքով հանդես եկավ ՀԳՄ նախագահ Էդվարդ Միլիտոնյանը՝ նշելով, որ Ֆելիքս Մելոյանն ուներ իր գրական հայացքի ճշգրտած ուղեծիրը և հրաշալի հետք է թողել մեր գրական կյանքում: Ցերեկույթը վարում էր բանաստեղծ Խաչիկ Մանուկյանը, որ անդրադարձավ գրական միջավայրում Ֆելիքս Մելոյանի գործունեությանը: Նա նշեց, որ Ֆելիքս Մելոյանը եզակի դեմքերից մեկն էր՝ ուղղախոս, միշտ հավատարիմ իր սկզբունքներին ու նրա գիրը գեղարվեստական գրականության զորություն ունի: Ֆելիքս Մելոյանի «Գրի իրականության մեջ» էսսեն ընթերցեց Հովհաննես Թումանյանի անվան տիկնային թատրոնի դերասան Յուրի Կիրակոսայանը: «Հրանտ Մաթևոսյան» մշակութային բարեգործական հիմնադրամի տնօրեն, արձակագրի որդի Դավիթ Մաթևոսյանը խոսեց Հրանտ Մաթևոսյանի և Ֆելիքս Մելոյանի ընկերության ու նրանց սերնդի մասին՝ բնորոշելով Ֆելիքս Մելոյանին որպես հայ գրականության մեջ չափորոշիչներ ճշգրտող ու բարձրարժեք գրականությունը գնահատող գրականագետի: Ելույթ ունեցան գրականագետներ, բ.գ.դ. Աելիտա Դոլուխանյանը, բ.գ.դ. Վազգեն Գաբրիելյանը, բ.գ.դ. Պետրոս Դեմիրճյանը, բ.գ.թ. Արքմենիկ Նիկողոսյանը, բ.գ.թ. Արմեն Ավանեսյանը: Նրանք խոսեցին Ֆելիքս Մելոյանի, սերնդակից գրողների, նրա «Ընթացք» գրքի, ուղենշային հոդվածների, «Գրական թերթ»-ում և «Նորք» ամսագրում որպես խմբագիր աշխատանքի ու գրականագիտական գործունեության մասին: Բանաստեղծներ Սամվել Կոսյանը, Շանթ Մկրտչյանը, արձակագիր Ռոլանդ Շառոյանը, ինչպես նաև Սպարտակ Նազարյանը պատմեցին Ֆելիքս Մելոյանի հետ գործընկերության և հետաքրքիր հանդիպումների մասին: Ելույթ ունեցողներն արժևորեցին Ֆելիքս Մելոյանի բացառիկ մարդկային ու մասնագիտական հատկանիշները: Ցերեկույթի ընթացքում Խաչիկ Մանուկյանն ուսանելի դրվագներ պատմեց Ֆելիքս Մելոյանի հետ ունեցած զրույցների, տաղանդավոր գրողների նրա գնահատանքի, բարձր գրական չափանիշների մասին ու ավարտին արտասանեց նրան նվիրած իր բանաստեղծությունը:
