ԿԻՐԱԿՈՍ ԳՈՒՅՈՒՄՃԵԱՆԻ «ՅՈՒՇԱԳՐԱԿԱՆ ՊԱՏԱՌԻԿՆԵՐ» ԳՐՔԻ ՇՆՈՐՀԱՆԴԵՍԸ
Կիրակոս Գույումճեանի «Յուշագրական պատառիկներ» գրքի շնորհանդեսը
Հուլիսի 21-ին Հայաստանի գրողների միության հովանավորությամբ «Կոնգրես» հյուրանոցում տեղի ունեցավ սփյուռքահայ գրող, հրապարակախոս Կիրակոս Գույումճեանի (Քուվեյթ) «Յուշագրական պատառիկներ» գրքի շնորհանդեսը: Բացման խոսքով հանդես եկավ Ռիթա Կաղեանը: Նա ներկայացրեց Կիրակոս Գույումճեանի կենսագրությունը: Տեսաշարի միջոցով նկարներ ցուցադրվեցին գրքից, որոնք ներկայացնում էին Կիրակոս Գույումճեանի ստեղծագործական ու բարեգործական գործունեությունը Սփյուռքում, Հայաստանում ու Արցախում: Արձակագիր Պերճուհի Աւետեանը ներկայացրեց գիրքը՝ արժևորելով այն ոչ միայն որպես հուշագրություն, այլև սփյուռքահայ գրողի անդրադարձ համահայկական հարցերին: Անի Թորանեանն ընթերցեց «Հայուն թուքը» պատումը Կիրակոս Գույումճեանի գրքից: Բանաստեղծ Տիգրան Գաբոյեանը խոսեց Կիրակոս Գույումճեանի գրական, հասարակական ու բարեգործական գործունեութեան մասին: Հայաստանի գրողների միության նախագահ Էդվարդ Միլիտոնյանն իր ելույթում անդրադարձավ Կիրակոս Գույումճեանի ստեղծագործական գործունեությանը, նրա նախկինում տպագրված գրքերին, ինչպես նաև «Յուշագրական պատառիկներ»-ին՝ գնահատելով նրան՝ որպես սփյուռքահայ գրողի ու հրապարակախոսի: Տեսաերիզի միջոցով իրենց սրտի խոսքն ասացին Մեծի Տանն Կիլիկիո կաթողիկոսության Հայագիտական Կենտրոնի տեսուչ, հրապարակագիր Ահարոն Շխրտըմեանը (Բեյրութ) «Ազդակ» օրաթերթի խմբագիր, հրապարակագիր Շահան Գանտահարեանը (Բեյրութ), «Գանձասար» օրաթերթի խմբագիր Զարմիկ Պօղիկեանը (Հալեպ): Երաժշտական կատարումներով հանդես եկան Սօֆի Ստեփանեանն ու Արամ Խաչատուրեանը: Ելույթ ունեցավ նաև «Ժամանակ» օրաթերթի խմբագիր Արա Քօչունեանը: Ելույթ ունեցողները մեծապես գնահատեցին Կիրակոս Գույումճեանի գրական, հասարակական ու բարեգործական գործունեությունը: Կիրակոս Գույումճեանը շնորհակալություն հայտնեց իր գրքի, ինչպես նաև գործունեության գնահատանքի մասին հնչած ելույթների համար: Այնուհետև Տեր Խորեն քահանա Պերթիզլյանի օրհնությամբ ունեցավ գրքի գինեձոնի արարողություն և հեղինակն իր գրքերից նվիրեց ներկաներին:
