ԹԱՐԳՄԱՆՉԱՑ ՏՈՆԸ ՕՇԱԿԱՆՈՒՄ
Թարգմանչաց տոնը Օշականում
Հոկտեմբերի 11-ին Օշականում նշվեց Թարգմանչաց տոնը: Սբ. Մեսրոպ Մաշտոց եկեղեցում գրողներն ու թարգմանիչները մասնակցեցին Սրբոց Թարգմանչաց տոնին նվիրված պատարագին ու ծաղիկներ դրեցին Մեսրոպ Մաշտոցի շիրիմին: Եկեղեցու դպրատանը տեղի ունեցավ Մայր Աթոռ Սբ. Էջմիածնի և ՀԳՄ համատեղ «Կանթեղ» թարգմանական մրցանակի հանձնումը: Այն սկսվեց Տեր Գարեգին քահանա Արսենյանի օրհնությամբ: ՀԳՄ նախագահ Էդվարդ Միլիտոնյանը ողջունեց ներկաներին՝ խոսելով Թարգմանչաց տոնի, թարգմանության և մեր գրականության համար նրա կարևորության մասին: Այնուհետև նա մրցանակները հանձնեց թարգմանիչներին: Մրցանակներ տրվեցին Նատալյա Գոնչարին՝ անգլերենից հայերեն, Ռուզան Միրզոյանին՝ ֆրանսերենից հայերեն, Գագիկ Բաղդասարյանին՝ իտալերենից հայերեն և Նինո Սպանդերաշվիլիին՝ հայերենից վրացերեն թարգմանությունների համար: Մրցանակակիրները շնորհակալություն հայտնեցին ստացած մրցանակների համար: Իրենց թարգմանություններն ընթերցեցին Էդվարդ Միլիտոնյանը, Լևոն Բլբուլյանը, Գագիկ Դավթյանը, Շանթ Մկրտչյանը, Բաբկեն Սիմոնյանը և Հերմինե Նավասարդյանը: Թարգմանության մասին խոսեցին ու Թարգմանչաց տոնի առթիվ թարգմանիչներին շնորհավորեցին Հենրիկ Էդոյանը, Գարուն Սարգսյանը և Արևշատ Ավագյանը:
