ՀԱՆԴԻՊՈՒՄ ՔՈՒՐԴ ԳՐՈՂԻ ՀԵՏ
ՀԱՆԴԻՊՈՒՄ ՔՈՒՐԴ ԳՐՈՂԻ ՀԵՏ
Օգոստոսի 23-ին ՀԳՄ էր այցելել քուրդ գրող Քուրթուլուս Բասթիմարը: Նա հանդիպեց ՀԳՄ նախագահ Էդվարդ Միլիտոնյանին: Նրանք զրուցեցին հայ և քուրդ գրողների, Հայաստանում քրդական մշակույթի զարգացման, տարածաշրջանային, ինչպես նաև Թուրքիայում ազգային փոքրամասնությունների խնդիրների մասին: Քուրթուլուս Բասթիմարը ծնվել է Կարս քաղաքում, արձակագիր է, մարդու իրավունքների պաշտպան, ստեղծագործությունները թարգմանվել են մի քանի լեզուներով: Իր ստեղծագործություններում նա անդրադառնում է մարդու իրավունքներին և ազգային փոքրամասնությունների խնդիրներին ու նրա վերջին՝ «Հրաժեշտ ազատությանը» գրքի հրատարակումը արգելված է Թուրքիայում: Քուրդ գրողը պատմեց Հայաստանի մասին ապագա վեպի, իր ստեղծագործությունների հայերեն թարգմանության և հետագա ծրագրերի մասին: ՀԳՄ նախագահը պատասխանեց նրան հետաքրքրող հարցերին, պատմեց ՀԳՄ աշխատանքների, Գրողների միության անդամ քուրդ գրողների, նրանց ստեղծագործությունների հրատարակության, քրդական մամուլի ու Հայաստանում նրանց ընձեռված հնարավորությունների մասին:
